Sogndal: Lingesetfjellet og Storehaugfjellet (25.04.2013)

Vi starta ved flyplassen i lett skydekke, på Kaupanger regna det når vi passerte så litt usikre på veret. Trakkemaskina hadde nok vore til topps før på dagen og det passa oss fint. 30-40 cm nysnø når vi kom oppover litt. Lengst nede rann det elvar over veien så vi fekk bløyte fellene skikkeleg. Då blir det som kjendt klabbar lenger oppe. Nærmare toppen letta det skikkeleg og vi fekk nydeleg påskestemning i solveggen til det store bygget på toppen. Vurderte ei stund å plukke med Storhaugen 1169 men droppa dette. Skiltet på Storehaugfjellet viser Storhogen 1178.

© Ove Lotsberg

Lise og masta på Storehaugfjellet

Tok av fellene og rende ned til Lingesetevatnet 784. Etter litt labbing bortover ga vi blaffen i fellene. Vi gjekk vidare til Lingsetfjellet utan feller, med tilløp til klabbing. Seier vel litt om vedlikehald av skisålane her i huset. Det er like kjedeleg som å pusse sko. Tetta seg til ein del og litt utriveleg på siste topp. Trudde no vi skulle gli omtrent ned til flyplassen. Etter å ha funne veien ved linja innsåg vi at dette vart gåing nedoverbakke. Tung sugande nysnø. Planen var å plukke Holsåsen som bonustopp, men tørste lærarkollegaer venta på hotellet i Sogndal. Det vart oppladning til lærarstemne der i staden for tur på Holsåsen.