Isane Grand Prix: Dombesteinseggene, Kvasshornet og Kårnyken (25.09.2016)

Kvasshornet og Kårnyken er fjell eg har sett på sidan eg var liten. Kanskje rart at eg ikkje har kome meg på dei før, men det har altså ikkje vore så vanlig i vår familie å gå på fjell både her og der. Noko eg forsøker å rette litt opp i no om dagen då altså.

Sidan vi residerer på Stårheim no i desse fine haustvekene møtte eg berre opp på ferga med joggesko og lett sekk. Ein del vind i dag, og mild austavind gjorde at ferga måtte ta rennfart for å legge til.

Eg gjekk deretter rett opp vegane på Isane og fulgte stien som er merka på kartet opp mot Langemyra og Steinkassen. Denne stien er nok ikkje brukt lenger ettersom det er bygd skogsveg opp her. Likevel OK å gå, med fin skog, hjortegroper og utsikt.

Etter eg passerte sætra vart stien tydeligare opp forbi Steinkassen. Heretter greit å gå oppover til Dombesteinsegga Aust. Her var det svært kraftig kastevind, no frå sørvest, og lite trivelig.

Etter dette raskt bort til Kvassegga, der det var litt mindre vind. Skreiv meg inn i boka her. Siste besøk var medio august. Fantastisk utsikt innover Nordfjorden.

Deretter gjekk eg vest for Småvotna til 956-punktet vest for Kårnyken for å kike litt på den flotte sørveggen ned mot Ålfoten. Virkelig eit spennande område! Fulgte kanten bort til Kårnyken. Her kom sola og vinden løya. Deilig!

Rusla så den fine egga bort til Ø2. Uproblematisk bort her, og veldig flott utsikt. Dette bør ein ha med seg om ein er her oppe!

Litt fjellfies her før eg jogga ned grasbakkar til Gamlesætra. Her er det bygd skogsveg nesten heilt opp. Sprang vegane nedatt til fergekaia.

Eg vil gjette at dette er raskaste vegen til Kårnyken og Kvasshornet. Ein går god veg ganske langt opp (kan vel køyre ganske langt også, vegane er av veldig god kvalitet), og då er ein ikkje langt under skoggrensa. Så greie grasbakkar til topps.