Rauma: Middagstinden og Kinnakollen (12.10.2016)

Hadde overnatta i bilen på Måna Camping. Kjøyrde bomveg, kr 90, mot Bøstølen og parkerte rett over brua der den merka ruta til Tindevatnet startar. Det var frose til, så hardt og fint å gå myrpartia langs elva. Snart oppe i sola vart det svettebyer og lettelse i antrekk. Runda rundt på nordsida av humpen 943 i skaret. Tenkte å ta denne på returen, slik vart det ikkje. Nå er den uvesentlig så det gjer forsåvidt ingenting. Opp bratt ur til den flotte ryggen som går til Middagstinden. Skjønte med ein gong at her vart det endringar i planane. På austsida av ryggen går det ei hylle/renne nedover i retning Kinnakollen. Denne skulle testast ut! Vidare langs den spennande og flotte ryggen til det luftige og meget fine toppunktet på Middagstinden. Lang og god pause i sola, her snakkar vi kremtopp! Så var det ned igjen ryggen og på austsida ned den renna/hylla. Dette gjekk kjempefint, ingen problem. Siste par hundre høgdemeterane ned til skaret mot Kinnakollen var det ein del lavt bjørkekratt. Så kom eg inn på den nymerka og nyrydda råsa frå kraftverksinntaket til Kinnakollen. Det vart ein liten etappe på vei tilbake til bilen. Overnatta der og var klar til Nonstinden neste dag.