Aure: Arasvikfjellet og Bergefjellet (27.05.2015)

Ja, det er merka sti til Arasvikfjellet. Men kva hjelper det når det er steikje umuleg å finne den? Parkerte på fergekaia og inntok lunch medan bygene herja ute. Vi rota rundt og snakka med lokalkjende før vi fann stien. Her er korleis du skal gå: Parker på fergekaia. Gå opp bakken og ta til høgre på ein dårleg vei/traktorvei på toppen av bakken. Følg denne til du har passert ein liten bekk og kjem til ei mark. Følg gjerdet oppover, kliv gjerdet og hald fram opp til skogkanten. Ein svak sti langs gjerdet og på marka, men når du kjem opp i skogkanten finn du raudmerkinga. Stien oppover er lett å følgje og godt merka heilt til topps på Arasvikfjellet.

Vi skulle vidare. Fulgte stien eit stykke nedover før vi tok av mot Svarttjønna 309 som vi passerte på sørsida. Herifrå er det ein langdryg rygg til Bergefjellet, for det meste utan sti. På returen gjekk vi frå Svarttjønna austover langs stiar og dyretrakk til vi kom inn på den merka ruta igjen.