Tur to og tre i Rogaland var minneverdige (16.07.2014)

Super dag i Rogaland. Dagen starta med Utstein kloster som var ei stor oppleving. På tide å få med seg dette kulturminnet. Mor på 82 var motivert for ein liten topptur, så vi køyrde over til Rennesøy, følgde vegen til Dale og så opp til Sel. Nydeleg lyngheilandskap og svært godt merkt stig. Senior stoppa på siste platå før toppen, medan eg for fram og tilbake på 15 minutt eller så. Herleg utsikt! Kulturlandskapet er verna, og det er vel fortent, for det er verkeleg heilt spesielt.
Ettermiddagen tenkte vi å bruke på båttur til Kvitsøy. Framme ved fergeleiet oppdaga vi at vi hadde 50 minutt på oss. Mora mi måpte då eg valde å bruke den tida på å finne Randabergs høgaste. Rota ein del utan ordentleg kart, men køyrde til slutt opp til ein gard som såg ut til å ligge høgt! Rulla ned vindauget, og jo, spørsmålet om toppen kjende gardskona godt att, ho hadde hatt besøk av fleire av den sorten sa ho. Mamma venta i parkert bil bak låven, medan eg småjogga gjennom hamnehagen over gjerdetrappa og opp der ho hadde peikt. Der møtte eg ein rev! Såg han nært og lenge medan han skar over berget der toppen er markert med nokre jernboltar, rett sud for gjerdet som kryssar toppen. Jogga tilbake, hadde 7 minutt til ferga, og vi rakk han. Mamma var altså nesten med til topps på Rennesøyhornet, den andre hadde reven og eg for oss sjølve.